Bana Kusum බාණ කුසුම්

2021 වසරේ ස්වර්ණ පුස්තක සම්මාන අවසන් පොත් අතරට තේරුණු

ඒ නග්න ස්ත්‍රී ප්‍රතිමාව දිහා බලනකොට පරම්පරා දහයකට එහා ඉතිහාසයක් තමන් ඉදිරියේ දෑස දල්වාගෙන ඉන්න වග ඈට දැනුණා. මැජික් කණ්ණාඩියකින් බලනවා වගේ ඉතිහසයේ සුළි කුණාටුවලට හසු වුණු ගැහැනු රූප ගණනාවක් ඒ අස්සෙන් පේන්න පටන් ගත්තා. සමහර විට මායා බලයකින් වගේ ඒ දැවමුවා ප්‍රතිමාව ගුප්ත ඉතිහාසයේ අගාධයකට තමන් ඇදගෙන යනවා කියාල ඈට හැඟුණා.

ඒ චංචල පිරිමි දෙනෙත ඉදිරිපිට නොසන්සුන්ව හිටගෙන සිටින නිබ්බුතා සැරින් සැරේ වට පිට බැලුවාය. හාත්පස පෙනෙන්නට කිසිවෙකු නැත. දිය නෑමෙන් පසු තවමත් තෙතබරිත ගතියක් පෙන්වන කෙණ්ඩය බෙල්ලට කොට බැඳ සිටි ඈ උඩු කය යන්තමින් වසන උතුරු සළුවෙහි කොණක් වරින් වර අල්ලමින්, හිතෙහි පැසවන චංචලකම මිරිකා ගත්තාය.
පිරිමි ඇස් දෙක සිය සිරුර හරහා දුවමින් සිටින බව ඇයට දැනේ.