“සයුරු…”
“ම්…” මහා කඩා වැටීමකින් යුතුව ඔහු න්ම් හඬක් නැගුවේය. මගේ සිත තුළ තිබි සිතිවිලිවලින්ම දැන් ඔහුද දැවෙන වගට සැකයක් නැත. ඉදින් මා දන්නා සයුරු එහෙමය. වැරදි කර තිබුණද කවදත් ඔහු සඳෝත්තමාගෙන් මිදෙන්නට කැමති වූ මිනිසෙකු නොවේ.
*තව පැය හත අටකින් එළි වෙනවා…” මම ඔහුට එලෙස අනතුරු ඇඟවුවෙමි.
ඔහු වුවමනාවෙන් මදෙස හැරී බැලුවේය. ඒ දෑස්වල පෙට්‍රොල් ලන්ටෑරුමේ එළියට දිලිසෙන මද තෙත ගතියක් වෙයි. මට අතීතයේ සයුරු සිහි විණි. අපගේ වෙන්ව යෑම් අසල මුලින්ම කඳුළු ඉස්සර කරගන්නේ ඔහුය. මම හැමදාම හඬා ඇත්තේ තනිව සහ මගේ හොඳම මිතුරිය වූ දේවනී සහ අම්මා එක්කය. ඉතින් එය නොදුටු සේ මම ඔහු අසලින් නැගිට ගත්තෙමි. පියවරක් දෙකක් ඈතට ගොසින් සිනාසී වටයක් කැරකුණෙමි.
“මං ලස්සනද…? මේ… තව ඔයා ගෙනැත් තිබුණු ඇඳුමක් මම ආයෙ නාලා ඇඳගත්තේ…”
ඔහුගේ දෑස් මත වූ තෙත ඒ තුළම වියළන්නට මම කුඩා දැරියක සේ හැසිරුණෙමි. ඒ මත් දෑස්වලට කොහොමටත් කඳුළු රිසි නොවේ. ඒවා හැම විටම තිබිය යුත්තේ මා කෙරෙහි වූ දරුණු තෘෂ්ණාධික හැඟුමකින් ගිනිගෙනය.
“මගෙ මැණික තමයි ලස්සනම!”
************************
“ වේව්ස් දාලා නිල් ඩෙනිමට තනි සුදු ශර්ට් එක අත් නවලා ඇඳල ආයෙ කොහේවත් කාටවත් පේන්න යන්නෙපා… “
මේ ලෝකයේ ඇති සියලුම පිරිමි විලාසිතාවන් අතරින් මට ඔහුව බොහෝ කඩවසම් පිරිමියෙකුව පෙනෙන්නේ ඒ සරල ක්‍රමයටයි. එබැවින් එය අන් ළඳක දකිනවාට මට ඉරිසාවක් දැනේ.
කෙසේ හෝ අවසානයේ… ඔහුට ආදරය කරනා යහපත් යුවතියක සොයාගෙන විවාහ වන්නැයි කියා ද අනාගතය මීට වඩා හොඳ තැනක් කර ගන්නට වෙහෙසෙන්නැයි කියා ද කියන්නට ඕනෑ වුවත් එවැනි සංකීර්ණ කතා බස් වෙනුවට මට පිටවුනේ අර සරල වචන දෙක තුන විතරය. සයුරු සතුටින් ඉන්නට ඕනෑය. දෙවියනේ ලෝකයේ කොහේ හෝ තැනක ඔහු ඔහුට සතුට ඇති නැවතුමක් සොයා ගත යුතුය. නමුදු මා ඉදිරියට නැවත නොපැමිණිය යුතුය. එවැනි වූ දහසක් දේ සඟවා මම සුහද සිනාවක් පාමින් කීවේ මෝඩ කතාවකි.
“ ආයෙ එහෙම අඳින්නෑ “
මගේ හිස පිරිමදිමින් ඔහු කීවේ දෑස් අද්දරටම පැමිණ වැටෙන්නට ඔන්න මෙන්න තිබූ මගේ කඳුළුවලට දිරි දෙමිනි. මීට දිනයකට ඉහත උදෑසනදී සේම අද ද මගේ දුර්ලභ කඳුළු බිඳු දෙකක් කොපුල් හරහා ගලා යද්දී මම ඒවා පිස ලමින් නැවත සිනා සී ගෙනම උන්නෙමි. හැඬුම් එක්කම සිනා සෙන මගේ උවනේ ක්ශනයෙන් ක්ශනය වෙනස් වෙන හැඟීම් දෙස සයුරු බලා සිටියේය. නළලත කොනක දිගු හාදුවක් තැබුවේය. මම ඊට දෙනෙත් පියා ගතිමි.
“ මගෙ රත්තරං කොහොම හරි සතුටින් ඉන්න බලන්න… පුලුවන් කමක් තිබුනොත් ආයෙමත් මුල ඉඳලා ඔයා ගැන හිතන්න බලන්න. මම හිතන්නෑ මේ ලෝකෙ ඉන්න මොන තාත්තෙක්වත් තමන්ගෙ දරුවොන්ගෙ කැමැත්තට පිටින් තීරණ අරන් එයාලගේ සතුට නැති කරයි කියලා… “
සයුරු කීවේ මගේ දෙනෙත්වලට එබී ගෙනයි. එය පැල් බැඳන් කල්පනා කරන්නට ඇති ලොකු කතාවකි. මගේ දෑස් තිගැස්සෙන්නට ඇත.
Reviews
There are no reviews yet.